زاوية خضراء .. بقلم:داؤد ابوكلام داؤد : قائد الدعم شيريا وغزو هبيلا بالجبال الستة (إعادة للزاوية بعد موت شيريا )

هبيلا والجبال الستة لمن لا يعرفها هي كبري مشاريع الزراعية الآلية المطرية بجبال النوبا وجنوب كردفان والسودان وتقع داخل وخارج التخطيط وهي الداعم الأساسي لأسواق الأبيض والرهد بالسمسم والذره والدخن وصمغ الهشاب وغيرها من المنتجات الزراعية والغابية. انا شايف مواقع التواصل والوسائط من امس قاعده تقول بأن قوات الدعم السريع وقوامها كتيبة بقيادة شيريا وبرشم وماكن ومعهم (٤٨) عربة قتالية بها (٦) مدافع ثنائي وعدد من المواتر الهدف منها الهجوم علي مدينة هبيلا اليوم الاحد ٣١ ديسمبر ٢٠٢٣. ده يعني ختام لعام الشؤم ولا شنو مثلا.( ناس الدعم السريع ديل ذي حيوان الصبرة ترمي (ضنبها جاي وتمشي غادي ). وقالوا كمان هسي هم في الدبيبات بجنينة اولاد بدر وخور السدر (جنس استخبارات ههههه) انتهي الخبر يا شيريا. (طبعا واحد من القادة التلاته ديل كان شغال حرس بالزكاة في كرتالا وقام بقتل شمبلي أثناء مطاردت زكاة الانعام ). طبعا في حياتي لم التقي القائد/عبدالمنعم ابراهيم منذ ان كان بالدعم السريع بكادقلي والملقب(بشيريا شاي الكركدي الاحمر). وشايف تحت تحت بعض اصدقاءه يلقبونه(بالسعودي ). شفته ورايته مره واحده في صورة فيديوا بوسائط التواصل لونه فاتح يشبه الشنابلة وكان جالس علي قوز احمر و في ضراءه ويده اليمني (حجابات وتمائم ). تعود جزور عبدالمنعم ابراهيم الي الحوازمة اولاد نوبا الفقرة (عجائب كمان في نوبا عرب ههه). عمودية عبد الجليل إمارة الرواوقة الامير الراحل/عثمان بلال اخي وعمي وصديقي الرجل الخلوق المهذب..له الرحمة والمغفرة واقرب الناس لشيريا في كادقلي ان لم تخني الذاكره هم ناس عطايا وسومي ويوسف الغائب. عموما نعود الي شيريا. في جلسة من جلسات السمر مع امي(سيدة نورين ).قبل أيام قلائل ماضيات بحب بتونس معاها أطول فترة ممكنة وطبعا كلامها عفوا الخاطر من القلب الي القلب يا أجمل ام.. سالتها انتي يا سيدة راجل بتك التومة (ام الحسن) صالح فضل الله محمد بليلة وهو طبعا من العرب الشنابله ام بريش .قالت لي قالوا مشي لشيريا في الدبيبات .!!؟؟ (طبعا صالح وشيريا كان ضمن قوات كافي طيار بكادقلي) اخر مره انا لاقيت صالح في كرتالا زريبة المواشي لما مشيت البلد وبعدها جاء بيتنا وشايل كمية من لحم الابل في( الخرج او الجراب ) قلت لي اختي ده شنو اللحم الكتير ده .؟؟؟ ههههه فهمت كلامي قالت لي لا لا كان عنده جزاره في كرتالا. وبرضوا لقيت ابوي جاي من الكدرو من (ام تكزي فرقان عرب الشنابله). قال مشيت جبته حمارتي من صالح سنة كامله معاهوا ما رجعها لي مشيت جبتها..؟؟ (سامعكم تقولي لقي اختك دي وين هههه). طبعا اختي اصلا (داية وقابله) قاعده تمشي تولد نسوان العرب في الفرقان ولمو فيها وعرسوها. نرجع للوالدة(سيدة نورين ) قالت لي صالح من امو فاطمة عنده أربعة اخوات (ام شيك ) زوجها من ناس البركة. واختها التانية تقول اسمها (مقبولة ) متزوجها شيريا انت ما شفته العجوزة (امنة ) القاعده تجيني في البيت بالحمارة دي حبوبة ناس صالح ام فاطمة. وغير ام ناس صالح دي عمك المرحوم فضل الله عندو تلاته نسوان تاني . ام عاشم (عشة) ولدها صديق ويوسف (تلوشي ) وأم ناس بريقع دي (ميته) وزوجته ام عيد. عندها بشير وجادين . وأم عاشم بناتها فاطمة وحليمة وبخيتة وديل كلهم زوجوهم في الكدرو بالجبال الستة. بخيتة تزوجها حسين ود جدك جرو حسين. وفاطمة(فطين ) تزوجها تزوجها ود عمك يسن انقيا محمد(تينجا) ود عمتك ام بخت وديل من الكافير .وحليمة تزوجها إسماعيل ود حمدان(نانديه ). وصالح زوج التومة ذاتوا متزوج تلاته. رابحة واختك وزوجته الصغيرة جاتنا البيت شايله بت صغيرة قالت لاختك نمشي نتفش الراجل ده التومة قالت(بري بري مالي ومالوا ). طبعا سيد الاسم شيريا ذاتوا متزوج من اربعة. الاولي من بنات اهله وبت الامير العميد/كافي طيار نوبا البرام كادقلي .وزوجته من الشنابلة ام بريش وزوجة من المسيرية وهسي برضوا قالوا تزوج من الدبيبات اخيرا والعلم عندالله. ويا القائد شيريا اهلك الان موجودين بالكدرو بالجبال الستة. (الرجول التبلدي ) وبهائمكم موجودة وعلاقتك مع (عبدالرحيم دقلو معروفه وانت ابنه المقرب ). عموما يا قادة الدعم السريع بالدبيبات قبل كده سائق قائد لواء هبيلا هرب بسيارة القائد وعلمها يرفرف وسلمها لكم في طيبة وبرضوا هجوم التكمة وهي جزء من هبيلا. وبرضوا انت دخلت منطقة دبيكر والرجول بالكدرو وقابلتك جزء من الإداره الاهلية ممثلة في المك/ابراهيم موسي والمك/قادربية حسين. وقالوا لكم نحن كامارة الجبال الستة قادرين نحمي بلدنا مع شبابنا ما محتاجين للدعم السريع.؟؟ رغم ذلك هسي قواتك قاعدة تتحصل من سوق الرجول عموما الكلام السمعناهوا ده كن صح ولا كضب مافي داعي للفتن بين القبائل في كردفان واتمني ان يكون كلام الوسائط ده اشاعة ساكت ونتمني الامن والسلام لجنوب كردفان عربا ونوبا وانا في ختام الزاوية اتصلت بي زوجتي من مدني وقالت ناس الدعم دخلوا عليهم الساعة تسعة ليلا امس وحددوهم وضربوا عليها الرصاص تحت ارجلها وربك لطف واخذوا منهم مبالغ من المال وخرجوا ودي اهلاها من الحوازمة من القوز اها رايك شنو يا قائد الحوازمة الهام شيريا . ؟؟؟ لو ما عارف المك/مهدي علي تيراب تابع للجبال الستة وهبيلا الان عبارة عن سودان مصغر طاب لهم المقام فاستقروا بها فلا تزعزع استقرارها.

المك/داؤد ابوكلام داؤد. الناطق باسم إمارة الجبال الستة.