الجمعة , يونيو 25 2021
داؤد ابوكلام داؤد

زاوية خضراء.. داؤد ابوكلام يكتب: النوبه والبقاره حكايه تضحك الغنمايه

اثير نيوز-
ما أجمل العيد دائما أيامه فرح وسرور وسعاده وتسامح وتصافح وكله عفو وعافيه يا سلام من موية الصافيه وتحياتي للناس الساكنه في الصافيه و ساكنه الخرطوم وكمان ام درمان بلد الأمان؟؟ لكن بيني وبينكم. !؟ قلبي قاعد يدق.. تك.. تك.. الله يحفظك يا سودان خايف عليك .!؟ عموما بالأمس حصل ملتقى في محلية هبيلا بجنوب كردفان منطقة الكلدماية بالتكمه الواقعه في طريق الدلنج هبيلا. وهي منطقه مشهوره بالماء والجنائن الغناء الوارفه؟ . تحت شعار (القرون والجرون اقتصادنا). ههههه طبعا العرب قالوا البقر و الحصان والصمغ كلوا عربي حقهم بارد؟؟؟ . .. عليكم الله تعالوا قولوا السمك كمان عربي حقكم تبع الصحراء. كرهتونا!؟ نشكر لولدنا وزميلنا الصحفي الشاب/عبدالوهاب ازرق قام بتغطية شامله حيث قال الحركه الشعبية شمال تشارك بقياداتها في ملتقى التعايش السلمي بين النوبه والحوازمه ههههههه هو منو نوبه ومنو حوازمه ومن أين جاءت كلمة الحوازمه هذه والله حكاية تضحك الغنمايه وفي الأساس ضد من كان التحزم والتحالف.!؟ عموما ده ما موضوعنا نرجع لموضوع الساعة رغم أننا من محلية هبيلا لكن ما شايف مك من مكوك الجبال السته مشارك انشاء الله المانع خير. ولا دي لخدمة العيد خلتكم نسيتوهم؟؟ يا أهلنا الغلفان ودار نعيله (15) سنة الحرب بينكم سجال. انا داير اقول لأهل السودان لعلكم لا تعرفون العلاقه بين النوبه والبقاره كلهم خمسه في خمسه (وكمان شنو كده ما عارف في لباس واحد). مافي داعي لهذه العفانات التي بينكم. بعدين شايف النوبه بزعلوا شديد لما البقاره بيقولوا هم عرب من الجزيره العربيه. خلوهم انتو بزعلكم شنو دايرين يرفعوا معنوياتهم.. بعدين يوم القيامه بالتأكيد نحن عشمانين ندخل الجنة ونلاقي الرسول عليه افضل السلام. ونقول له يا رسولنا ونبينا البقاره ألفي جبال النوبه ديل كان اهلك ومنكم!؟ . بالتأكيد رسول الرحمه ها يبتسم ابتسامة جميله حلوه (ويسكت). وكلنا عارفين ده كلام دنيا ساكت.؟؟ بعدين النوبه والبقاره عارفين بعضهم ذي جوه بطونهم والبطن بطرانه!؟ . وكلنا أهل ومتزاوجين وكان بيننا. حب وغرام وسهر ليالي.. منذ عنتره وعبله؟؟ .وجدودنا عندهم أصدقاء هذا يسمي بهذا وهذا بهذا. كوكو وكاكا وكوه والشين وتوبين ونقول لولدنا ود هبيلا القائد/ الباقر كتر خيرك ونقول للقائد /الحلو دي عيديه حلوه منك.؟؟ وراجنك يوم 25 مايو الجاري تبدأ المفاوضات مع الحكومة بجوبا بكل جديه مادايرين اي لو لوه يا الوسيط الجنوبي . توت قلوال خلي بالك.؟؟ ونقول للوالي حامد البشير رغم انك كاتب وباحث في علاقات النوبه والبقاره وهسي بقيت حاكم لهم. لكن الحكاية دايره منك تشد حيلك. وتحلل قضايا الولاية خاصة مشاكل الاهل في الشرقيه بين اولاد علي وكنانه. ضروري تحسم هذا الملف بسرعة بالتنسيق مع شباب تقلي العباسية. عموما النوبه والبقاره ليس هناك ما يفصلهم المطلوب من الاداره الاهليه خطوه شجاعة لتحقيق السلام الشامل بالولاية. ونقول لا هلنا الغلفان (شربلي). خلاص اسكتوا. الصلح خير. ونقول للفريق / شمس الدين كباشي ديل كلهم اهلك خلي بالك منهم. وأهم حاجه عجبني كلام القائد/ الباقر. قال من يقتل يقتل ونقول له من يسرق يبتر ولابد من المحاكم المشتركه بين الطرفين. شايف الغنمايه قاعده تقول.. سيبك.. سيبك.. قلت لها شنو. يا غنمايه. قالت قول للحراميه.. يبطلوا سرقة.. التيوس.. وقامت ضحكت.. قلت لها عامله ضنبك القصير ده. (دبرك قاعد بره). قالت انت ما سمعته المثل. قال الحقيقه( دبر نعيزايه.قاعده في النقعه) ههههاي فعلا النوبه والبقاره حكايه تضحك الغنمايه.
المك/داؤد ابوكلام داؤد. الأحد ١٦ مايو ٢٠٢١.

عن admin

شاهد أيضاً

خربشات بروف هاشم علي سالم يكتب خربشات على جداريات الحوار (3) (ورشة أديس أبابا)

خربشات بروف هاشم علي سالم يتكتب خربشات على جداريات الحوار (3) (ورشة أديس أبابا) أقيمت …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *