الأحد , مايو 16 2021
مقالات رأي

محمد احمدالماذون يكتب: ضم ترابله

محمد احمدالماذون
مراجعات
=نضم ترابله ==
نحن الترابله معضين عراقي الصبر عينا على البلد وكراعنا في الطين.. نحن شايفين وعارفين صحيح انو نحن في الزفه لكن فاهمين عل الليد قصيري تشابي على الحجرات ومقيدين نناتل في الجنزير هو مكوتر على البرمندي… ياناس الحاكومه عوووك انتو قايلننا في اللقاليم مابنسمع ول زي نويس الخرتوم الكارنهن وراشنهن بي الرغيفايي ام جنيهين ونحن مقطعين مصارينا بي ام عشره!! نحن عارفين الحيكومه مو عند حمدوك!! ابدا ابدا.. انتو قايلين نحن رامينا جمل ول مرضعانا طيره!!!! الحاكومه ياها اللجنتين ديل الناسن مقنطرين تمنن ويحلبو!!! ياهن لجنة التمكين واللجنه اللقتصاديي . اولا بالتبادي اللجنه اللقتصاديي ساونلها زريبي وفي بابا حمدتي هيع.. عفيت منو دا لابينسعل ولابيتنشد على كيفو مره يتمطي ومره ينجبد.. اها الزريبي دي حملانا يبرطعن ساكت زولا يقول هع مافي ناس الأسعد والامجد وعيييك جنس دفس دفسيبه وهرس ولطش وكفح ولفح سووا الدار تسووه الباب محروس… اها اللجنه التاني.. لجنة التمكين ياسر العطا حارس الباب تب وكاشرو ورامي الكلاب وتعال ياناس وجدي وفردي جيتنا الليله ياقايدنا وحارسنا وفارسنا لينا زمن نفتش ليك.. يبرطعو العواين والفتوات وكل عتل زنيم مناع معتد اثيم كسر وعصر ماهن حيكومه براها عاشت الشرعيي الثوريي.. مدنيه مدنيا دي على الجماعه الفوق راسن قمبور لكن الترابله واقعين من السمي مية مره لكن برضو ياريس دار اسعلك إنت مالك قاطع المرقه نعل المانع خير مانحن برضو ناسك شنو حكاية الكهربا الزراعيي القت زيادتا الف في الميه دي؟؟ طبعا الوليه السويتا لينا والي وانت عارف نحن مابنمشي للحريم نقولهن سولنا شي تعال شوف حكاية الكهربا دي والمرا الجبتها لينا سوقا معاك.. ياخي نحن عراقينا مشروط وسفنجتنا نخرتا دلقان تجي تلملم قروشنا تديهن وليدات الملازمين اسمع ياريس هووي البلد حبلا انهلهل وفضل فرد تو يمين الله ينقطع عل تنبشك سبله سبله ونويسك ديل ماهن الرجال البلموها ويحزمو تمساحيتا ودعناكن الله.. ودالماذون..

عن admin

شاهد أيضاً

مساحة حرة: المهندس عمر البكري ابوحراز يكتب:《مرحباً بالبعثة الأممية والخطة الأمريكية》

اتعجب وأمتع نفسي بالدهشة من الأصوات التي تتوجس وترفض الدعم الإداري من الأمم المتحدة والذي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *