زاوية خضراء. بقلم:داؤد ابوكلام داؤد. مدينة الابيض والخبز المفقود

الخرطوم- اثير نيوز

قبل أيام قليلات ماضيات كنت في طريقي من الابيض ابوقبه فحل الديوم. الي الرهد ابودكنه المسكين ما سكنه.!؟ وكلها مدن كردفانيه مشهوره بتجارة المحاصيل.والرهد مشهوره بترعتها وسمكها الطازج الشهي. وكان سبب الزياره بان الوالد ابوكلام داؤد بخيت ناصر كلن.؟المت به وعكه صحيه الزمته الفراش لدي شقيقتي الاستاذة/بدور. ومكثت معهم بعض الوقت. وهنا في الرهد وجدته خبز جميلا كبير الحجم وقلت لهم كم سعره قالوا عشرة جنيهات. فكجمته ووجدته خبزا لزيزا زكي الرائحه حلو المزاق.؟؟.وهناك في موقف التكاسي الصفراء التي يسمونها الدوام لله ههههه طبعا لسرعتها الفائقه ؟؟ رايتهم ياخذون كميات من الخبز الي الابيض طبعا بيصل دافئ وحار من نارو.؟؟ وبعد الطمانينه علي صحة الوالد ؟؟ وانا في طريقي الي الكافير اخذت معي كيسا يمسي (ابكر اراح).وحشوته بخبز الرهد ؟ وهنا في البلد كم كانت فرحت امي بجمال خبز الرهد. وشكرتني ودعت لي دعوات ما اجملها.يا سلام يا يمه؟؟.وهنا في البلد الضراء من اوله الي اخره كسره او عصيده وعندما نصيد الارانب البريه أو نزبح ديكا جميل التاج تحضر الينا في الضره ذاك اليوم القراصه…سامعين الكلام ده ياناس الشماليه يعني في جبال النوبه في قراصه. هههههه. وسلام علي البديريه اكلي الشعيريه ومحبي لحم الارانب!؟…وفي طريق عودتي للابيض مره اخري ممررت بمحليه القوز. ومن سوق دبيكر ركبنا الحافله .وهي في طريقها توقفت بنا لحظات في سوق البركه والتي منها هجم جيش المهديه هكس في شيكان. وهنا هجم ركاب الحافله علي الخبز والسلطة والطمام اديني بميه اديني بمئتان وشفط شفط انتهي الخبز. وكانت هناك جاره لي في الحافله قالت لي احسن ليك شيل رغيف معاك قلت لها ساجدو رغيف في الابيض عينت لي كده شعرت وكانها تقول لي العوير ده.؟؟.وواحد هناك خاتي سماعات في اذنه قال بان السودان الان في الوضع الصح الريف يغذي المدينه؟؟ قالت لي نحن جينا من الابيض الليله الصباح.بعشرين جنيه ما لاقين رغيف.!؟ ووصلنا الابيض ونزلته من الحافله وضربته تلفون للأولاد سلامات .كلامات .. اها .. دايرين شنوووو.؟؟ يا ابوي جيب معاك حاجات للاكل من الصباح ما لاقين رغيف..ياساتر ياساتر.. وكن ما لقيت رغيف جيب معاك. لبن واقاشي ناكله ساكت.. ؟؟.مشيت لبتاع البن لقيت الحله مقلوبنه يعني انتهي اللبن…طوااالي مشيت مطعم قدوره. ولقيت زحمه شديده..وصلته لبتاع الفول قلت له..داير طلب فول طمعا في الخبز.؟؟ اعطاني واحد فول وثلاثه عيشات صغيرات كانها الزلابيه؟ قلت له وانا في غاية الخجل؟؟. اديني عيشه زياده..مشكور اعطاني عيشه زياده فرحت جنس فرح..وجيت البيت واتعشينا.!؟.ومن يومها شغالين كبسه وقراصه وعصيده ؟؟ منذ أن وصلته الابيض حتي اليوم لم اكل الا ثلاثه عيشات إلا ربع؟؟. مشينا انا وصحبي عبد الباسط اجمل مطعم في الابيض اسمه(وادي مارب) قلنا لهم دارين نفطر عندكم شنو قالوا عصيده بملام رووب وتاني عندكم شنو.. عصير وبس خلاص!؟ ..ما هذا المارب يا وادي مارب ومشينا قدام لقينا واحد اخونا مهندس ..كلام سلام قال فطر في السوق الغربي.بعصيده وملاح الروب..وكمان قال انت ماشفته الحاجه الغريبه شنو.؟ الحاجه عملت كبده ومالقت رغيف وخافت تبور لها..قالت نديكم طلب كبده هههههه. طبعا حنينا علي حالها. اكلنا كبده بالعصيده لقمه هنا ولقمه هناك حلوه ولزيزه ما احلي الكبده بالعصيده.!؟. ومرقنا الشارع لقينا مظاهرات في السوق بالقرب من الشاشه قاعده تقول ما دايرين خالد ما دايرين خالد وهو والي شمال كردفان.؟؟قديما قيل كردفان ام خيرا جوه وبره ولكن كردفان بقت ام جوعنا قتلنا وللخبز فقدنا..!؟ والظاهر السودان كله فاقد للخبز والغاز. البلد قحتت. ؟؟.
المك/داؤد ابوكلام داؤد. السبت الموافق.23/1/2021.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *