زاوية خضراء .. بقلم: داؤد ابوكلام داؤد .. الشجر والبحر والأقلام

ياسلااااام علي حلاوة القرآن وجمال القرآن وقرآن الفجر ( إن قرآن الفجر كان مشهودا ) ولماذا الفجر من دون الأوقات لأن الحضور والشهود من الملائكة لعلك نسيت عندما سجدوا لأبونا آدم كلهم أجمعين إلا أبليس الحسود اللعين.؟؟ والفجر عنوان الفلاح والصلاة فيه خير من النوم (في ناس جنها نووووم والنوم بجيب اللوم). اذاً لازم نقاوم الشيطان والنوم رقم حلاوة الأحلام فيه. !؟ يعني اي زول قام وصلي الفجر حاضر هو في (معية الله ). (إني معكما أسمع وأري). لاتحزن أن الله معنا.!!؟؟ والغطاء كان العنكبوت والحمامة. ؟؟ الله معااااك تاني خائف من شنوا يازول. نرجع للموضوع الخواطر دي كلها عشان شنوا. !؟ بعضنا أو معظمنا نقرأ القرآن هكذا دون تأمل نمر فيه مرور الكرام أو مر السحاب. !؟ تلقي الواحد يفتخر ويقول ليك أنا قرأت جزء من القرآن أنا ختمته القرآن ثلاثة مرآت في رمضان. أنا حافظ كذآ جزء من القرآن. لا أريد أن أقول لك أنت( كالحمار تحمل اسفاراً ) المهم في خواطر اليوم رغم انني مثلكم حريص كل الحرص علي تلاوة القرآن كل صباح لكن هذا الصباح وقفت طويلاً أمام (سورة لقمان والاية ٢٧) فيها قال تعالي (ولو أنما في الأرض من شجرة أقلام يمده من بعده سبعة أبحر ما نفدت كلمات الله إن الله عزيز حكيم ) شنوا..شنوا..شنوا .صبرك..صبرك…أقيف هنا شويه يا (أبوكلام). وخلي بالك من كلمة (شجرة وأقلام وانت زول صحفي ). كل الشجر ولا نوع معين من الشجر تبقي أقلام وتملأ بماء سبع بحر مسكته (قلم البك وقلم الرصاص ). ونظرت إليهم هكذا !!؟؟؟ قلم واحد ممكن تكتب به شهر كامل لو كنت صحفي مثلنا أو كاتب محكمة و عرضحالات ؟؟ طيب لو شجر الدنيا كلوا يبقي أقلام !! وسبعة ابحر بقت حبر سائل.!؟ التحدي الأعظم ربنا قال ليك (ما نفدت كلمات الله ). يا خيبتكم…يا خيبتكم يا كتاب و صحافيي العالم. البحر الأحمر والبحر الأبيض المتوسط والبحر الأسود والبحر الكاريبي وبحر البلطيق. وبحر وبحر وبحر اي بحر في رأسك شيل منهم سبعة (إن الله عزيز حكيم). عزه ذي العزه. خليك من البحار لو عملنا قلم واحد كبير كده وملأناهوا بماء نهر النيل الخالد وجبنا ورق وردمناهوا حتي وصل عنان السماء وجئنا بكل قطن الدنيا وعملناهوا مخده علي الكرسي(عشان صلبك ما يسخن ). ونبدأ نكتب ثم نكتب ونكتب..عن كوكب الأرض بما فيه من عمائل الجنجويد و مليشيا التمرد في السودان من انتهاكات واغتصابات وشفشفه ونهب وقتل وتشريد وبما في كوكب الأرض من حمير وعملاء وديوك وجداد بلدي وبيطري وبيض وريش ولحم مشوي ولحم في شكل شاورما وكوارع ده كلوا لسع ما انتهينا من كلام دنيا كوكب الأرض وعندك السموات والسماء الدنيا بما فيها من سحاب ومطر ونجوم وشمس وقمر وما تنسي الملائكة تحدي ذي التحدي (إن الله عنده علم الساعة وينزل الغيث ويعلم ما في الأرحام وما تدري نفس بأي أرض تموت إن الله عليم حكيم) ده العلم يا أهل السودان وأهل كردفان خصوصا شايف في ناس كده عاملين بروفات ودكاتره وشغالين نوبا وعرب بقارة وحوازمة ما هذا يازول تواضع شويه والقعونجه الاكبر دكتور حمدوك بن كردفان العاق اول حاجة امش حل مشكلت اهلك في القوز والدلنج..بعدين تعال امشي باريس و فرنسا !؟ وناس السودان عموما انتوا كم ذاتكم شفتوا رأس قلم موية نهر النيل ينتهي من موضوعكم كله. طبعا الشجر هنا يشمل شجر الأرض ولكن لادري داخل فيها شجرة سدرة المنتهي وشجرة ابليس التي أكلاء منها ادم وحواء في الجنة. طبعا ما تنسوا شجرة المؤتمر الوطني وشجر العشر وشجر النيم ياسلااااام علي التأمل في قرآن الفجر انه كان مشهودا تشهده الملائكة التي سجدة لآدم في الجنة إلا أبليس أبي أن يكون من الساجدين حساده وحقد منه قال لربنا ديل ناس طييين سااااكت فهمتوا يا ناس السودان يا طيين يا عجين يا هجين وعلي رأسهم الحاقدين خلوا الحرب وأجنحوا للسلاااام والتعايش السلمي بينكم.

المك/داؤد ابوكلام داؤد .مدير عيون التلال الاعلامي. الجمعة ١٩ أبريل ٢٠٢٤.